Kirkja Jesú Krists hinna Síðari daga heilögu hefur breytt heiti áætlunar sinnar sem hjálpar fólki sem glímir við eða hefur skaðast af ávanafíkn í Lækning fyrir milligöngu frelsarans: Bataáætlun frá ávanafíkn. Hún gaf einnig út uppfærðan 12 skrefa bataleiðarvísi í tengslum við hið endurskoðaða heiti áætlunarinnar.
Þessar breytingar leggja áherslu á að lækning af ávanafíkn og áráttuhegðun hefjist þegar þátttakendur snúa hjörtum sínum að frelsaranum, Jesú Kristi. Áætlunin hvetur til aukinnar tengingar við Guð og aukins stuðnings annarra.
Aukin áhersla á Krist
„Með því að breyta heitinu til aukinnar áherslu á Jesú Krist, er áhersla lögð á lækninguna sem hann veitir og friðþægingu hans,“ sagði Blaine Maxfield, framkvæmdastjóri Velferðar- og sjálfsbjargarþjónustu kirkjunnar. Þótt það geti tekið tíma, þá er mögulegt að sigrast á raunum og ávanafíkn fyrir milligöngu Jesú Krists. Með þátttöku í Lækning fyrir milligöngu frelsarans: Bataáætlun frá ávanafíkn, geta einstaklingar fundið von, lækningu og styrk til að endurbyggja líf sitt með því að snúa sér til frelsarans.“
12 spora kerfi bataáætlunarinnar hjálpar þátttakendum að sigrast á ávanafíkn og áráttuhegðun með innblásnum batareglum: heiðarleika, von, trausti á Guði, auðmýkt og fyrirgefningu. Það felur í sér trúnaðarnet stuðningsaðila og úrræði á netinu sem hjálpar þeim að upplifa breytingu í hjarta og lækningu.
Batahópar ávanafíknar eru nú aðgengilegir á ýmsum stöðum og tungumálum
Hinir gjaldfrjálsu og trúnaðarbundnu batahópar, sem ekki takmarkast við kirkjumeðlimi, eru tiltækir rafrænt hvarvetna um heim og í eigin persónu á sumum stöðum. Þeir eru leiddir af þjónustutrúboðum. Hópar hafa einnig leiðbeinendur sem eru í batameðferð og vilja styðja aðra sem vilja læknast. Batafundir ávanafíknar eru haldnir í 42 löndum og á 31 tungumáli. Tímasetningar og staðsetningar funda, bæði rafrænna og í eigin persónu, eru skráðar á addictionrecovery.ChurchofJesusChrist.org.
Þegar evrópsk systir var spurð um reynslu sína af bataáætlun ávanafíknar, sagði hún: „Ég hef lifað hluta af lífi mínu með áfengisfíkli. Upphaflega trúði ég að ef ég elskaði, skildi og styddi maka minn nægilega, myndi hann hætta neyslu. Ég varð úrvinda og fann til örvæntingar.“ Hún hélt áfram: „Frá fyrsta fundi fann ég fyrir traustu andrúmslofti. Námskeið kirkjunnar lagði áherslu á mikla elsku Jesú Krists. … Er við báðumst fyrir saman, fann ég kraftaverk fyrirgefningar og hlaut nýjan styrk frá Guði. Jesús Kristur er hinn mikli læknir og hann læknar sár sálarinnar… Ég mæli eindregið með bataáætluninni frá ávanafíkn fyrir alla sem þjást af ánetjun.“
Finna styrk í Drottni
Bataáætlun frá ávanafíkn, sem kirkjan stendur að, byggist á því að fólk tengist innbyrðis og veiti hvert öðru stuðning til að sigrast á ávanafíkn og jafnframt að tengjast frelsaranum, Jesú Kristi. Hann vill liðsinna okkur í baráttu okkar og er uppspretta lækningar.
„Frelsarinn er mjög meðvitaður um allar raunir okkar og baráttu,“ sagði Ben Erwin, fjölskylduþjónusturáðgjafi sem hefur umsjón með bataáætlun frá ávanafíkn. „Þegar við komum saman til að veita hvert öðru stuðning við að sigrast á þessari áskorun með hjálp hans, þá er mín reynsla sú að hann er þar meðal okkar.“
Farið á addictionrecovery.ChurchofJesusChrist.org til að finna fund. Á vefsíðunni eru líka hvetjandi frásagnir, myndbönd og leiðbeiningar fyrir stuðningshópa. Þið getið líka hlustað á hlaðvarpsþætti af hljóðrituðum fundum til að læra hvernig fundir fara fram.
